Sigrún Inga Hrólfsdóttir skynjar huglæg áhrif náttúrulegra efna eins og endorfíns, oxýtósíns og estrógens sem liti. Sjónræn birtingarmynd ósýnilegra krafta eins og átaka, löngunar, ástar og vellíðunar afhjúpar flókinn vef tilfinninga, stjórnmála, vísinda og valdatengsla. Málverk hennar sækja í abstrakt impressjónisma, dulspeki og rúmfræði og bera með sér sterka táknfræði og sálfræðilegar og andlegar vísanir. Skúlptúrar á borð við leg heklað úr leiðandi koparþræði hnykkja á femínískri áherslu á að lífið byggist á samvinnu og tengslum.
